الخوف
لخوف يا علة ف لجوف
نكالة ف ركايز الرجولة
مطروز ف لقلب حروف
رضعناك حليب ف الطفولة
يا دم ف عروقي يطوف
مملوكة ذاتي بيك معلولة
وذني لساني و حتى الشوف
جوارحي لسلطانك مذلولة
لخوف يا غلة الظروف
و زمان الحكرة بطولة
الضمير ب لباطل ملفوف
الشر سيوفو مسلولة
لبسناك اشكال و صنوف
جذورك ف لقلب مفتولة
ب لمزاوكة نرضيوك او لحلوف
يا ريث اعذارنا مقبولة
ف شباكك طاحو أولوف
حيرة و النفس مقتولة
قهرة و بوسان لكفوف
حتالين يا أهل لعقولة
حتالين الظهر معكوف
و مصيرنا ف حكام لغولة
سلك حقنا ف لمصروف
لخواطر ضعيفة مشلولة
دواك يا خيي معروف
تمسك ب حبال لمولا
نصل جلد لخوف
تبان طرقانك محلولة
ليست هناك تعليقات