أنا الصعيدي
أحب أهلي وبلدي
وأحب أبويا وجدي
واخد من أبويا أسمي
وحته من شكلي
وواخد من جدي الأصول بالدور
بس عقلي ملكي
ملبسشي... توبهم
وأكره.... ذنوبهم
مش ماشي بالإشارة
خضرا أعدي
حمرا أقف...
وألف للخلف ...دور
أحب أكون نفسي
مش أي حد تاني
عشان مكاني
أعيش في ضلة
وأعيش مغمور
أحب أكون ....المستقبل
والحاضر إللي مش مغلوب
محبش الماضي
أكره فيه الكسر والمجرور
محبش ألف في تراك
وخطوط مرسومه بالمسطرة
وأدور في أفلاك
أحب أكون أنا الملاك
أحب أكون النور
محبش أكون تور
في ساقية العمدة
أو في الوابور
متغمي من طلعة الصبح
لآخر نور
ولا أحب أسجد لصنم
ولا أكون... خرووف
في حومة.... غنم
يتعلف للعيد
مستني حد السكينة
وسن الساطور
محبش أقف في طابور
مستني يدوب.... دور
والرغيف إللي يذلني يغوور
أنا الصعيدي
أحب أكون الأول
أحب أكون منصور
ليست هناك تعليقات